BAGUIO CITY – Maag-agasan ita iti ospital ti maysa a barangay kagawad kalpasan a tinagtagbat ti maysa a lalaki sadiay Purok 7, Barangay San Jose, Luna, Apayao idi Sabado, alas siete ti rabii.
Nabigbig ti biktima a ni Greg Tubang, 51-anyos, ken residente iti nasao metlaeng a lugar.
An-anupen met ita dagiti pulis ti suspek a ni Sebastian Gaab, addaan iti ligal nga edad ken kaarruba metlaeng ti biktima.
Sigun iti report ti pulisya, nagturong ti biktima iti pagtaengan ni Mayor Josephine M. Bangsil kadwana ti asawana ken ti maysa pay a babae tapno alaenda ti Jet Matic Pump a maaramat iti lugarda.
Idi nagsubli daytoy iti lugarda ket killaat a tinagtagbat daytoy ti suspek iti namin-adu a daras.
Nabaelan met ti biktima a naglibas ken nagkamang iti balay ti anakna.
Kinamat pay ti suspek ti biktima ngem naglibas metlaeng daytoy kalpasan a nakapaglemmeng ti biktima.
Agtultuloy a maag-agasan ti biktima iti Cagayan Valley Medical Center bayat a manarimaan ti manhunt operation para iti panakatiliw ti suspek.
