Kinumpirmar ti Department of Migrant Workers (DMW) a limneden ti bulk carrier a MV Tutor nga inatake ken pinasabugan dagiti rebelde a Houthi iti Red Sea.
Iti baet dayta, saan paylaeng a nasarakan ti maysa kadagiti seafarer a mapukpukaw.
Sigun kenni Department of Migrant Workers Secretary Hans Cacdac, naudi a naimatangan ti MV Tutor idi Hulyo dise syete ngem naiyanod daytoy gapu iti napigsa a dalluyon ken maatap a limned daytoy iti paset ti eastern coast ti Eritrea iti Red Sea.
Kinuna ni Cacdac a mapukpukaw daytoy isu’t gapuna a patienda a limned daytoy.
Gapu iti daytoy, ur-urayen ti Department of Migrant Workers ti sumaruno nga adda para iti posible a panangbiruk iti nasao a barko.
Inlawlawag met ni Cacdac, a saanda a mabalin nga ikumpirmar a pimmusay ti mapukpukaw a seafarer apaman nga awan pay ti nasarakan iti bagi daytoy.
Nupay kasta, impasigurado ti nasao nga ahensya nga ipaay dagitoy dagiti tulong para kadagiti pamilya ti mapukpukaw a seafarer.
Kabayatanna, nakaawid metten iti pagilian dagiti dua pulo ket maysa a Pilipino Seafarer idi lunes.
Iti agdama, mangisayangkat ti Department of Migrant Workers iti imbestigasyon mainaig iti nasao nga insidente.//Rose
