La Trinidad, Benguet- Indaolwan ti Benguet Congressional Office ti maysa a taripnong kadagiti sports coordinators manipud iti sangapulo ket tallo a munisipyo ti Benguet para iti panaglukat ti baro a season ti Cong Eric Go Yap Basketball League.
Sigun kenni Kevin See, Chief of Staff ni Cong. Yap, dakdakkel ti pasalip a mailukat ita a tawen agsipud ta maigiddan ditoy ti umuna a season ti Volleyball tournament para kadagiti babbai.
Agserbi kas venue iti panaglukat ti liga ti Benguet Sports Complex idiay La Trinidad, Benguet.
Mapatgan nga agay-ayam ditoy dagiti agdama ken sigud a varsity players ti basketball ken volleyball a residenti ti Benguet.
Tarigagay ti nasao a liga tapno maital-o ti high level competition ti ay-ayam a basketball ken volleyball nu sadino ditoy a mabuya dagiti “cream of the crop” wenno dagiti maipanpannakel a players ti tunggal munisipyo.
Nakalukat ti pasalip kas “open category” wenno dagiti players nga addaan dakkel a kapadasan kadagiti dadakkel a liga nu sadino saan laeng a mapatgan dagiti agdama a players dagiti professional leagues kas iti PBA, MPBL, NBL, PSL, PVL ken dadduma pay.
Maipalagip a nagkampeon ti La Trinidad Team 1 iti season 1 ken nangabak dagitoy via sweep kontra Bokod.
Nagbalin pay a highlight ti Cong Yap Basketball League ti All Star game nu sadino dagiti napili a players ti Benguet ket nakasango da dagiti dati a PBA stars.//Jordan Tablac
