BAGUIO CITY – Ad-adalen ita ti Police Regional Office – Cordillera (PROCOR) no irekomendarda iti Commission on Elections (COMELEC) ti panakaideklara wenno panakaipasidong dagiti munisipyo ti Tadian ken Bauko sadiay Mt. Province kas ‘area of concern’ iti masungad a May 2019 midterm elections gapu iti presensiya ken aktibidad dagiti komunista a New People’s Army (NPA).
Iti panagsarungkar ni PNP Chief Police General Oscar Albayalde iti probinsia ti Benguet, kinunana a mabalin a maipasidong iti ‘red category’ ti election hotspot dagiti lugar nga addaan presensiya ti armado a grupo ken dagiti komunista nga NPA kas iti Bauko ken Tadian.
Kagiddan iti daytoy ket imbilinna ti panagtalinaed ti ‘full alert status’ ti amin nga unit ti pulisya sadiay Mt.Province kontra iti aniaman a plano wenno gandat a panagraut wenno panagriribuk dagiti komunista.
Kinuna met ni PROCOR Regional Director Police Brigadier General Israel Ephraim Dickson a makikokoordinardan iti COMELEC para iti nasao a pakaseknan.
Sigun kenkuana, dagiti paylaeng munisipyo ti Sadanga ken Bontoc ti naipasidong iti red category ti election hotspots iti nasao a probinsia iti masungad a basingkawel.
Kabayatanna, nangisayangkat dagiti 19 a babbarangay ti Tadian iti peace rally ken unity walk idi kalman ken ditoy nga impeksada ti panangkondinarda iti ar-aramiden dagiti komunista iti lugarda.
Impasigurado met ti gobernador ti Mt. Province nga agtaltalinaed ti linak ken kappia sadiay iti baet dagiti nagsaruno nga insidente iti nagbaetan ti tropa ti gobyerno ken dagiti komunista nga NPA sadiay Bauko ken Tadian a nakatayan ti dua a pulis ken nakadangran ti 10 a dadduma pay.
