BAGUIO CITY – Agtaltalinaed a sibibiag ti bayanihan ditoy rehiyon Cordillera gapu iti kaadda dagiti tattao nga addaan ti nabalitokan a panagpuspuso a mangipapaay kadagiti donasyon para kadagiti indibidual nga agkasapulan ti tulong.
Sigun kenni Khristine Molitas, co-founder ti Bayanihan Cordillera, agtultuloy ti panangipaayda ti tulong kadagiti agkasapulan babaen iti donasyon nga ipatpatulod dagiti nagduduma nga indibidual.
Inlawlawagna a saan laeng a dagiti umili ti Cordillera ti naiwarasanda ti taraon, kawes ken dadduma pay a pagkasapulan iti kusina ngem ketdi, karaman metlaeng dagiti biktima ti kalamidad sadiay Batangas.
Inaklonna met a nakaawatda ti komento manipud kadagiti sumagmamano nga indibidual nga agbalin a sadot dagiti tattao gaputa agdependar laeng dagitoy iti tulong nga ipaay ti grupoda.
Nupay kasta, kinuna ni Molitas a matarosanna ti obserbasyon ti publiko ngem mamati daytoy a kwalipikado wenno maikari dagiti indibidual a maipapaayan ti tulong.
Impettengna pay a maituloy latta ti bayanihan uray agleppas ti mapaspasaran a pandemya gaputa saan nga agsarsardeng ti kasapulan dagiti tattao ken dagiti mangipapaay ti donasyon kadagitoy.
