BAGUIO CITY–Ituloy latta ni Baguio City Mayor Benjamin Magalong nga aramiden ti mandatona kas Contact Tracing Czar ti pagilian agingga nga awan pay ti takder ti Malakanyang iti panagretiro daytoy.
Kinuna iti Bombo Radyo Baguio ni Mayor Magalong nga adu pay ti kasapulan a mabantayan iti contact tracing nangrunga sadiay Bontoc, Mt. Province a nakailistaan ti UK Covid Variant.
Malaksid iti daytoy, kinunana a nasken a tulunganda ti La Trinidad, Benguet agsipod ta saanda a naaramat ken nalipatanda ti insuroda a wagas ti contact tracing.
Kinunana nga agingga ita ket adda latta ti agar aramat iti papel iti contact tracing isut gapu a nabuntog ti proceso ti tracing kadagiti dadduma nga LGUs.
Dinakamatna nga adu pay ti nasken a masuruan iti sistema ti epektibo a contact tracing.
Kabayatanna, kinunana posible nga opisyalen a naawat dagiti maseknan nga opisyal ti resignation daytoy kalpasan a nakasaritana ni DND Secretary ken National IATF chief implementer Carlito Galvez.
Nupay kasta, inkarina ti panangipaayna latta ti tulong para iti contact tracing ti pagilian.
