BAGUIO CITY – Niraman ti Baguio General Hospital and Medical Center (BGHMC) kadagiti napili a hospital sites para iti clinical trial ti amin nga FDA approved COVID-19 vaccine ditoy pagilian.
Nailanad iti surat ni DOH-Cordillera Regional Director Dr. Ruby Constantino kenni BGHMC-Medical Center Chief Dr. Ricardo Runez a nangipatulod ti DOST iti Letter of Approval manipod iti Contract Research Organizations mainaig kadagiti kaudian a clinical trials nga inaprobaran iti FDA.
Nasken nga 18-anyos nga agpangato dagiti mabalin a makipaset iti nasao a clinical trial.
Inlawlawag met ni DOH-CAR Assistant Regional Director Dr. Amelita Pangilinan a saan a baro a bakuna ti maaramat iti clinical trial ngem ketdi, dagiti amin a bakuna kontra iti COVID-19 a maipasidong iti panagadal.
Sigun kenni DOST Undersecretary Rowena Cristina, maysa kadagiti akem ti Task Group on Vaccine Evaluation and Selection (TG VES) ti mangiwanawan iti panakaipatungpal dagiti COVID-19 vaccine trials iti entero a pagilian kas maysa kadagiti nabigbig nga istratehiya tapnu makapataud ti pagilian iti bakuna.
Amin dagiti clinical trials ket rumbeng a maipasidong iti evaluation ken approval proces mangrugi iti DOST-Vaccine Expert Panel, ti Single Joint Research Ethics Board ken ti Food and Drug Administration (FDA) para iti final clinical approval.
Maibasar iti IATF Resolution No. 65, series of 2020, adda ti maipatungpal a zoning iti vaccine trial sites babaen iti TG VES.
Dagiti met Contract Research Organizations dagiti vaccine developer manipod kadagiti pribado nga COVID-19 vaccine clinical trials ti responsable a makiyuman kadagiti local government units a pakasarakan dagiti clinical trials.
