![](https://img.bomboradyo.com/baguio/2020/09/COMELEC-registration.jpg)
BAGUIO CITY – Posible a bumassit dagiti agparehistro a botante para iti May 2022 national and local elections ditoy rehion Cordillera.
Iti panakiyuman ti Bombo Radyo kenni COMELEC-Cordillera Regional Director Julius Torres, kinunana a gapu daytoy iti epekto ti mapaspasaran a krisis nga intunda ti pandemya ti COVID-19.
Dinakamatna nga ado kadagiti botante ti napabutngan ken agamak paylaeng a rumwar agingga ita gapu iti makapapatay a sakit.
Imbinglayna nga agingga nga awan ti maaramat a bakuna kontra iti COVID-19 ket namnamaenda ti bassit nga aplikasyon dagiti botante para iti sumaruno nga eleksion.
Iti baet daytoy, guyguyuguyen latta ti COMELEC-Cordillera ti publiko nga agparehistro dagitoy babaen iti online appointment ti ahensia para iti nalaklaka ken naparpartak a proseso.
Imbalakad pay ni Torres a mabalin latta nga aramiden dagiti aplikante ti walk-in appointment nangruna kadagiti nasusulinek a lugar.
Kabayatana, impannakel ni Director Torres nga awan kadagiti empleyadoda ti nakaptan iti COVID-19 virus manipud nangrugi ti community quarantine idi Marso.
Kinunana a dakkel a tulong ti panakasuspendir ti voter’s registration idi Marso iti panagtalinaed ti opisina a natalged manipud iti nasao a sakit.