BAGUIO CITY – Dumanonen iti uppat nga indibidual iti rehiyon Cordillera ti pimmusay gapu iti measles wenno kamuras malaksid pay a ngimmato ti kaso ti maatap a kamuras iti rehiyon ita a tawen 2019.
Sigun kenni Department of Health – Cordillera senior health officer Karen Lonogan, manipud January 1 agingga August 10 ket nakailistada iti 939 a kaso ti maatap a kamuras, nangatngato iti 967% no idilig iti 88 a kaso no idilig iti kapada a panawen idi 2018.
Nailista ti kangatuan a bilang ti maatap a kamuras ditoy rehiyon sadiay Benguet bayat a nailista ti kababaan a kaso ti maatap a kamuras sadiay Kalinga.
Nailista met laeng ti kaaduan a kaso kabayatan ti measles outbreak iti entero a pagilian.
Innayon ni Lonogan a nupay ngimmato ti kaso ti kamuras a nailista iti umuna nga uppat a bulan ti 2019, makitkitada met ti panagbaba ti nasao a kaso kalpasan ti aktibo a panagbantay ti DOH.
Inlawlawagna a ti kamuras ket addaan ti bukodda a siklo a naobserbaran idi 2012, 2014, 2018 ken 2019.
