BAGUIO CITY – Naksayan ti bilang dagiti rebelde a New People’s Army (NPA) nga agtaltalinaed kadagiti bambantay sadiay Mountain Province.
Sigun kenni Colonel Henry Doyaoen, commander ti 503rd Infantry Brigade ti Philippine Army, kumapkapoyen ti pwersa dagiti rebelde iti nagduduma a paset ti nasao a probinsia.
Nupay kasta, inaklonna a makaaw-awat ti militar iti impormasyon nga adda dagiti NPA manipod Visayas ken Mindanao a nagturong ditoy Cordillera tapnu mainayon iti nabatbati a pwersada.
Kinunana nga imbaon ti Communist Party of the Philippines dagiti sumagmamano a rebelde manipud dadduma a rehiyon tapnun ag-recruit iti baro a miembroda ditoy Cordillera.
Innayonna a puntirya latta dagiti komunista nga alaen dagiti agtutubo nangruna dagiti saan a nakaadal ken dagiti out-of-school youths.
Impetteng ni Colonel Doyaoen nga agbalbalin a biktima dagiti agtutubo gaputa awan ti panaka-ammoda a maar-aramatda iti krimen.
Gapu iti daytoy, iyap-apelana ti saan a panagpa-allilaw dagiti agtutubo ken dagiti umili kadagiti ididiaya dagiti komunista a rebelde.
