Dumanunen iti agarup 401 a tulang wenno tultulang ti tao ti narekober dagiti otoridad iti Taal Lake sadiay Batangas, mainaig iti kaso dagiti ‘‘missing sabungeros’.
Naipakaammmo daytoy bayat ti panagparang dagiti opisyales manipud iti Department of Justice, PNP Forensics Group ken dadduma pay nga ahensia iti panagdengngeg ti House Committee on Human Rights.
Maibasar iti datos manipud iti PNP Forensics Group, kinuna ni DOJ Assistant Secretary Eliseo Cruz a 401 a tulang ti tao ti narekober dagiti divers ti Philippine Coast Guard iti 17 a lokasion a nagdive-an da iti Taal Lake manipud Hulio 10, 2025.
Kabayatanna, kinuna ni PNP Forensic Group Director P/Brig. Gen. Danilo Bacas a 163 a tulang wenno iskeleton ti naipasidong iti cross-matching manipud iti DNA samples ti 29 a kabagian dagiti mapukpukaw a sabungeros.
Saan a maipasidong iti cross-matching dagiti dadduma a tulang, kalpasan a nadadael gapu iti nabayag a napaikababad daytoy iti Taal Lake.
