BAGUIO CITY- Ikalikagum manen ti lokal a gobyerno ti Baguio City ti negatibo a resulta ti Covid-19 test kadagiti turista a sumangbay iti lokalidad.
Iti panakiuman ti Bombo Radyo Baguio ken City Tourism Officer Engr. Alec Mapalo, maysa daytoy a wagas tapno malapdan ti posible a panagwaras ti nasao a sakit.
Malaksid iti daytoy, kinunana nga ad-adalenda met ti pannakalimitar ti bilang dagiti turista nga agturong iti siudad iti tunggal aldaw.
Kinunana a daytoy ket tapno saan a maulit ti napasamak idi napan a sabado a panagsangbay ti rinibribu a turista a rason a narigatan ti triage.
Impettengna a babaen iti pannakaisubli ti nainget a pagaladan ket maprotektaran ti salun-at dagiti empleyado ti nagduduma nga establisyemento ken dagiti umili iti siudad.
