Agtultuloy latta ti panagngato iti kaso ti Dengue iti Pilipinas ita a panawen ti panagtutudo kas maibasar iti datos ti Department of Health (DOH).
Pakabuklan nga 18,349 a kaso ti narekord manipod June 30-July 13, nangatngato ngem ti 12,153 a kaso manipod June 16-29.
Karaman kadagiti nagtalinaed ti panagngato ti kaso ti nasao a sakit ket ti Western Visayas, Central Visayas, Cagayan Valley, ken Calabarzon.
Sigun iti Department of Health, tunggal tawen, ngimmato ti kaso iti 33% manipod 97,211 a kaso iti 2023 agingga 128,834 iti 2024.
Nupay kasta, bassit met ti pimmusay gapu ti dengue iti agdama a tawen a dumanon laeng iti 337, nu idilig iti 378 a pimmusay bayat ti agpada a period idi napalabas a tawen.
Immunan a nagpalagip ti nasao nga ahensia iti publiko a kasapulan a suruten ti 4S strategy kontra dengue: Search and destroy breeding places; Secure self-protection; Seek early consultation; ken Support fogging wenno spraying in hotspot areas, nangruna ita a panawen ti panagtutudo.
