Bimmaba ti bilang dagiti krimen a nailista ti Baguio City Police Office iti immuna nga innem a bulan ita a tawen nu idilig iti kapada a reporting period idi tawen 2023.
Sigun iti datos ti nasao nga opisina, dumanon laengin iti 362 ti bilang dagiti krimen a nailista iti agadama a tawen, sangapulo ket walo(18) a nababbaba ngem iti 380 a nailista idi napan a tawen.
Manipod iti nasao a bilang, 220 ti naresolba a mangbukel iti 60.78 percent a crime solution efficiency.
Sigun kenni PLTCol Allan K. Sison, chief of Baguio City Police Office-Plans and Programs Unit, nangipatungpalda ti nagduduma nga intervention tapno mapasayaat ti crime solution dagitoy partikular iti panagparegtada iti koordinasyon iti City Prosecutor’s Office ken daduma pay a korte para iti naparpartak a panakairuar dagiti arrest warrants kontra kadagiti aglabsing.
Malaksid iti dayta, nangbukel metlaeng ti nasao nga opisina ti Special Tracker Teams (STT) a maar-aramat tapno mamonitor ti panakairuar dagiti arrest warrants ken ti lokasyon dagiti naglabsing para iti panakakemmeg dagitoy, kasta metten a nabukel ti “Oplan Pagtugis” para iti manhunt operation.
Kabayatanna, sumagmamano pay kadagiti intervention a naaramid para iti panangpababa iti krimen iti siudad ti nainsiriban a panangdutok kadagiti personnel kadagiti crime prone areas; naparegta a koordinasyon kadagiti daduma pay a maseknan nga opisina; kanayunan a pwersa para iti crime prevention strategies; ken panangimandato kadagiti establishimento a mangalada ti security personnel ken mangimuntarda ti closed-circuit television wenno CCTVs.
