BAGUIO CITY – Tinakderan manen ti Presidente ti Board of Directors (BOD) ti Benguet Electric Cooperative (BENECO) ti bileg dagitoy nga agpili ti agtugaw iti posisyon a General Manager (GM) ti kooperatiba.
Iti panakiuman ti Bombo Radyo Baguio, impetteng ni Atty. Esteban Somngi nga adda ti by-laws ti BENECO a mangipapaay kadakuada iti nasao a bileg ken karbengan nga agdesisyon iti agserbi a GM ti kooperatiba.
Kinunana a gapu iti daytoy ket saan a mabalin a maiyaleng-aleng ti nagbalin a desisyonda iti panakapili ni Engr. Melchor Licoben kas GM ti BENECO.
Inlawlawagna a dagitoy ti nasken a masurot gapu ta administrative supervision laeng ti aramiden ti National Electrification Administration (NEA) partikular iti panagmonitor no umno ti panakasurot ti proseso iti panagpili dagitoy.
Innayonna pay a saan a maikari ti panangisubmitir dagiti uppat a miembro ti BOD ti kooperatiba iti Performance Management Contract (PMC) para kenni Atty. Anna Marie Banaag-Rafael iti opisina ti NEA.
Kinunana a maibilbilang a minority laeng dagiti nangisubmitir iti nasao a PMC ni Atty. Rafael isut gapu a ti desisyon latta ti majority ti masurot ken saanda a bigbigen ti nasao a PMC gaputa saan nga isu ti tarigagay ti majority a miyembro ti BOD ti kooperatiba.
Gapu iti dayta, impettengna a ni Engr. Licoben laeng ti bigbigenda a GM ti BENECO.
Kagiddan iti dayta, kinunana a silulukat latta ti ridaw dagitoy iti posible a panakaipasidong ti saritaan ti sitwasyon dagitoy iti agdama ngem impaganetgetna a nakadisisyonen dagitoy para iti patugawenda a GM.
Iti baet ti daytoy, kinunana a tarigagayda ita a malpas ti sangsangwen dagitoy sitwasyon ken awan ti maaramidan dagitoy no ti kampo ni Atty. Rafael ti paboran ti desisyon ti korte iti kanito a madanon iti legal a proseso.
