BAGUIO CITY – Nainget nga ipalpalgip ti Burea of Internal Revenue (BIR) – Cordillera ti boluntaryo a panangited dagiti amin nga establishimento ditoy rehion Cordillera iti official receipt wenno resibo dagiti kustomer dagitoy nga uray saan a kiddawen ti maseknan a kustomer.
![](https://img.bomboradyo.com/baguio/2021/04/bir-1.jpg)
Sigun kenni BIR-Cordillera Regional Director Douglas Rufino, im-imbestigaran ken iparparikepda dagiti establishimento a madukduktalanda a saan nga agit-ited iti resibo ti kustomer.
Dinakamatna nga adu metten nga establishimento ti minultada ken adda pay dagiti naiparikep gapu iti namin adu a daras a saan a panagtulnog iti nasao a paglintegan.
Innayonna nga ita ket adda dagiti establishimento iti rehion nga im-imbestigaranda ita gapu iti kapada a panaglabsing kalpasan a nakaawatda iti reklamo manipud kadagiti maseknan a kustomer.
Sigun pay kenkuana, saanda kuma nga agiparikep kadagiti establishimento a naduktalan a naglabsing iti nasao a paglintegan ngem saan met a nga umno a rason dagiti business owners a nalipatanda a damagen ti kustomer no kayat daytoy nga agala ti resibo.
Inyunay-unayna a nasken a maipaayan iti resibo dagiti ginatang ti kustomer nga aggatad ti P100 nga agpangato.