Napadayawan ti Bombo Radyo Baguio kas service provider iti kalleppas a Culminating Activity ti National Correctional Consciousness Week 2024 a naangay iti Baguio City Jail Male Dorm ita nga aldaw.
Paset met ti National Correctional Consciousness Week ti panangbigbig ti Baguio City Jail Male Dorm kadagiti service providers a pakairamanan dagiti religious, government, ken media organizations.
Sigun kenni Jail Senior Superintendent Atty. Kenneth A. Bid-ing, regional director ti Bureau of Jail Management and Penology Cordillera, napateg ti akem dagiti service providers iti pannakaiwaragawag dagiti aktibidad ti Baguio City Jail Male Dormitory.
Impeksana pay ti panagyamanna kadagiti service providers babaen iti tulongda.
Malaksid iti dayta, imbinglay met ni Jail Superintendent April Rose Wandag-Ayangwa, jail warden ti Baguio City Jail Male dormitory a maragsakan daytoy iti dakkel a bilang dagiti service providers a dimmar-ay iti nasao nga okasyon.
Sigun kenkuana, dumanon iti sangapulo laeng a service providers ti dumar-dar-ay idi napalpalabas a tawen ngem ita, agarup singkwenta wenno 50 nga service providers ti dimmar-ay.
