BAGUIO CITY – Mabuya manen iti boxing ring ni 8th division world champion Manny Pacquiao kalpasan ti panagretiro na iti nasao nga ay-ayam idi Septyembre 2021.
Makalaban ti sigud a senador ti Korean Youtuber a ni DK Yoo intun Disyembre sadiay South Korea.
Naituding nga agpirma ti kontrata ti dua a boksingero intun Hulyo 20 iti Shangri-La The Fort sadiay Taguig.
Ni Yoo ket agtawen iti 43 ken addaan iti nasurok 650,000 followers iti Youtube nu sadino ti ipabpablaak na iti social media account na ket maipanggep iti martial arts.
Maipalagip a nagretiro iti boxing ni Pacman tapno agpokus iti karera na iti politika ken timmaray daytoy iti kina-presidente iti kalleppas nga May 9 National ken Local elections.
Naudi a nabuya ni Pacquiao idi naabak daytoy kontra iti Puerto Rican boxer a ni Yordenis Ugas para iti WBA super welterweight belt.
Iggem ti Filipino ring legend ti record a 62 wins, 8 losses, ken 2 draws.
