Manamnama a mangibaon iti ‘dakkel a puersa’ ti China idiay Scarborough Shoal sakbay ti naituding a “Philippine civilian mission” iti nasao a lugar, sigun iti maysa a United States maritime expert.
Iti social media account ni sigud a US Air Force official ken sigud a Defence Attaché Ray Powell, kinunana a dakkel a lapped ti nasao nga addang iti masakbayan.
Sigun kenni Powel, mapatta-patta nga agarup uppat a coast guard ken dua pulo ket innem a large maritime militia ships ti manglapped sadiay.
Mainaig iti dayta, ituloy dagiti sibilyan ti misyonda iti West Philippine Sea iti laksid ti naipadamag a “dakkel a puersa” dagiti Chinese vessels a paturong idiay Scarborough Shoal.
Sigun kenni Rafaela David, co-convenor ti Atin Ito coalition, agtuloyda nga aglayag iti natalna iti baet ti aniaman a pammutbuteng a mangmanggegda.
Kinunana pay nga aglayagda nga addaan ti determinasion ken salakniban ti teritorio ti Pilipinas.
Impaganetget ni David nga ipatungpalda a natalna ti “civilian mission” a naituding manipod Mayo katorse agingga disi siete gaputa maysa daytoy a nainkalintegan a pangipakat iti karbengan dagiti Pilipino ken “Philippine sovereign rights” kas nakabasar iti “international law”.
Sigun kenni David, saan a nakaskasdaaw ti pannakaadda dagiti barko ti China idiay Bajo de Masinloc, ngem aklonenna a nakalkaldaang daytoy.
Kabayatanna, maipalagip nga impakaamo ni Philippine Coast Guard (PCG) spokesperson for the West Philippine Sea Commodore Jay Tarriela a ti report ni nga impadamag ni Powell ket maibilang kas “safe forecast.”
Impasigurado ti Philippine Coast Guard ti natalged a pannakipaset iti civilian mission iti baet iti presensia dagiti barko iti Chinese iti nasao a lugar.
