Natiliw manen ti maysa pay a mapapati a manager ti na-raid a POGO hub idiay Porac, Pampanga a maysa a Chinese national bayat ti panangisayangkat ti search warrant dagiti otoridad iti nasao a lugar idi kalman.
Daytoy ti kinumpirmar dagiti otoridad ita nga aldaw.
Sigun kenni Philippine National Police – Criminal Investigation and Detection Group (CIDG) chief Police Major General Leo Francisco, sangapulo ket uppat a “safety vaults” ti nakumpiskar iti lima a villa iti nasao a lugar.
Mapapati a ti naarestar a Chinese national ket maysa kadagiti “big bosses” iti POGO hub idiay Porac.
Kinunana a kitkitaenda pay ti sumagmamano nga indibidual nga adda pakainaiganna iti iligal a Philipine Offshore Gaming Operators idiay Porac ken Bamban, Tarlac.
Posible a mapilaan ti kaso a human trafficking, physical injury, ken ti panaglabsing ti Access Devices Regulation Act dagiti suspek a natiliw.
