ATOK, BENGUET- Maipatpatungpal ti Unified Buying and Bayanihan Operations wenno Project UBBO iti munisipyo ti Atok, Benguet.
Iti pannakiuman ti Bombo radyo kenni Councilor Kelly Denn Tomas, kinunana a maysa metlaeng daytoy a rescue-buy.
Panggep ti program nga ilako kadagiti institutional buyers dagiti nateng nga apit dagiti mannalon sadiay Atok.
Iti nasao a programa, mapresio-an dagiti nateng maibasar iti gastos dagiti mannalon.
Sigun kenni Councilor Tomas, no mano ti nagastos dagiti mannalon ket isu metlaeng ti isingasingda a panggatang dagiti insititutional buyers.
Nagrugi ti pannakaipatulod dagiti nateng iti maysa a kompanya idi June 29, 2026.
Maibasar iti datos, naikailako ti munisipyo ti Atok ti agarup 30,000 a kilos ti repolyo; nasurok 50,000 a kilos ti wombok; nasurok 10,000 a kilos ti sayote; nasurok 4,000 a kilos ti kamatis; nasurok 4,500 a kilos ti patatas; nasurok 2,600 a broccoli; ken nasurok 2, 800 a kilos ti radish.
Iti agdama, karit kadakuada ti panagadu dagiti mannalon a nagpaista, isu’t gapuna nga agtultuloy ti panagbirukda kadagiti potential buyers.//mp4
“Siguro daytoy ti maysa nga panawagan tayo kadagiti kakadua tayo nga opisial, haan a kailangan nga adda tayo idiay posisyon, basta la kitdi kayat tayo nga i-lead ket i-lead tayo ladta, no anya man ti kuna tayo nga makatulong.“- Councilor Kelly Denn Tomas
