Manamnama a mangbukel ti Cybercrime Investigation and Coordinating Center (CICC), National Authority for Child Care (NACC), ken Philippine National Police-Women and Children Protection Center (PNP-WCPC) iti technical working group tapno mapasardeng dagiti nagannak ken dadduma pay nga adda pakainaiganna iti iligal online baby sellers.
Gapu iti daytoy, nagtataripnong dagiti maseknan nga opisyales itay laeng nabiit no sadino napagtatalantananda dagiti rumbeng nga addang tapno maisardeng ti panaglako kadagiti ubbing babaen iti online.
Sigun iti Philippine National Police, mailaklako dagiti ubbing iti P30,000 agingga P2 million.
Kinuna ni Police Colonel Renato Mercado, a dagiti nagannak a karaman iti iligal a panaglako kadagiti annakda ket gapu ta saanda a kaya nga ipaayan dagitoy iti kasapulanda.
Inlawlawagna, a gapu iti kinarigat iti biag ket isu ti rason dagiti dadduma a mang-ar-aramid iti saan a nasayaat a banag.
Nupay kasta, saan a rumbeng nga aramiden daytoy, isu’t gapuna nga idagdagadagda iti publiko a mabalin nga iturongda laeng dagiti annakda iti opisina iti Department of Social Welfare and Development (DSWD) tapno isuda ti mangiproseso para iti adaptation kadagitoy.
Kabayatanna, innayon ti Cybercrime Investigation and Coordinating Center (CICC) social media experts nga immunan a nabigbig dagitoy dagiti dua pay a barbaro a facebook pages a pagilaklakuanda kadagiti ubbing.
