BAGUIO CITY – Binigbig ti Provincial Mining Regulatory Board (PMRB) ti Mountain Province ti kaunaan a Minahang Bayan sadiay.
Maibasar iti PMRB Resolution No. 001, series of 2020, ti Minahang Bayan ket aglawa ti 10 nga ektarya iti masakupan ti Barangay Fidelisan iti munisipyo ti Sagada ken ap-aplikaran ti Northern Sagada Small-Scale Miners Association, Incorporated.
Nailanad pay iti resolusyon ti PMRB ti Mountain Province a natungpal ti grupo dagiti minero dagiti amin a kondisyon iti naited kadagitoy a clearance ti aplikasyon.
Kinuna met ni Mountain Province PMRB chair ken Mines and Geosciences Bureau – Cordillera Regional Director Fay Apil a naawatda ti memorandum idi June 8, 2020 manipud iti DENR Secretary a nangipaay ti clearance iti maap-aplikaran a disso a maideklara kas Minahang Bayan.
Iti panakaideklara ti small-scale mining area, kasapulanen nga agala ti grupo dagiti minero iti certification manipud iti National Commission on Indigenous Peoples, Environmental Compliance Certificate ken iti panakabigbig ti agserbi a mineral processing zone.
