![](https://img.bomboradyo.com/baguio/2021/10/Jeyric-Sigmaton.jpg)
BAGUIO CITY – Maipampannakkel ita ti Cordilleran artist a ni Jeyrick Sigmaton kalpasan a nangabak kas Best Actor iti Short Film Category ti kaleppas nga International Film Festival Manhattan (IFFM) Autumn 2021 New York.
Maipalagip a limmatak ni Sigmaton kalpasan a nagviral ti ladawanna ken naawagan ti “The Carrotman of the Philippines”.
Inakemna ti kangrunaan a karakter iti short film wenno pelikula naadaw iti pudpudno nga istorya ken napauluan ti “Dayas” nga insurat ken indirehe ni Direk Jianlin De Los Santos Floresca.
Sigun kenni Direk Jianlin, tampok iti pelikula ti biag dagiti small-scale miners sadiay Itogon, Benguet, partikular dagiti minero a da Bantay nga inakem ni Sigmaton ken Hakob nga inakem met ni Kel Vicente Aguilan a pakaimatangan ti karit iti panagbaliw ti panawen, panakaituloy ti pammati ken tradisyon ken ti saan a napadaanan a trahedya.
Iti pakasaritaan ti IFFM New York, daytoy ti kaunaan a gundaway a nangabak ti maysa a Cordilleran iti Best Actor iti Short Film Category.
Inabak ni Sigmaton ti co-nominee daytoy a ni Angelo Reyes ti Amerika iti pelikula a “21st Colonial” iti Best Actor Category.
Napili ti “Dayas” kas maysa kadagiti official selection ti Short Film Category ken nakalabanna dagiti pelikula nga inaramid dagiti baro ken beterano a direktor iti nagduduma a paset ti lubong.
Ti “dayas” ket termino dagiti Kankana-ey iti proseso ti panangisina ti balitok manipud iti concentrate wenno linang babaen iti panagaramat ti galvanized iron separator wenno sabak.
Mabuya met ti nasao a pelikula inton November 1, 2021.