BAGUIO CITY – Ipakpaka-ammo dagiti overseas Filipino workers (OFW) sadiay Hong Kong a natalged latta ti kasasaadda iti baet ti panagwaras ti coronavirus disease wenno COVID-19.
Iti interview ti Bombo Radyo Baguio kenni Jessica Agyapas, OFW sadiay Hong Kong manipud Kabayan, Benguet, kinunana nga itultuloyda nga aramiden dagiti wagas tapno makaliklikda iti virus.
Innayonna a saanen daytoy a rumrumuar manipud iti balay ti amona tapno makaliklikda kadagiti lugar nga ayan ti adu a tattao.
Dinakamatna nga adda latta met ti suplay dagitoy kadagiti kangrunaan a kasapulan uray mapaspasaran ita ti panic buying sadiay Hong Kong.
Sigun pay kenkuana, agkurkurang itan ti suplay ti face mask, tissue, bagas ken dadduma pay a gagatangen sadiay Hong Kong.
Kabayatanna, kinuna met ti maysa pay nga OFW sadiay Hong Kong a ni Beverly Lapisac a kanayon dagitoy nga agbasbasa kadagiti kaudian a damdamag tapno agtalinaed dagitoy nga updated iti kasasaad sadiay Hong Kong maipapan iti COVID-19.
