Idagdagdag ti Commission on Population and Development (CPD) kadagiti nagannak a pagsaritaanda ti maipapan ti “sexuality” kadagiti annakda iti tengnga dagiti kaso ti panagsikog kadagiti agtutubo a babbalasitang.
Daytoy ket kalpasan a napaliiw ti pannakangiwat ti Commission on Population and Development (CPD) a ni Mylin Mirasol Quiray nga adda ti nasurok a 2,000 a pannakayanak manipud kadagiti babbalasitang nga agtawen iti sangapulo (10) agingga iti sangapulo ket uppat (14) idi tawen 2019.
Immadu daytoy iti nasurok a 3,300 a pannakayanak idi tawen 2023.
Patien ti Commission on Population and Development (CPD) a ti panagsikog dagiti babbalasitang ket mabalin a mainaig iti seksual a panangabuso.
Kinuna ti nasao a komision a ti panangtalantan ti paset ti bagi ti maysa a tao ket rumbeng a mapagsaritaan iti uneg ti pagtaengan.
Dinakamat pay ti nasao a komision ti maipapan iti pornograpia ken dadduma pay a “sexual content” iti online, a nu saan a ma-regulate, “available” daytoy a mabuya dagiti agtutubo.
Maibasar iti panagadal manipod iti Philippine Statistics Authority a 44% kadagiti agtutubo a babbai a Pilipino ken 39% kadagiti agtutubo a lallaki a Pilipino ti awanan iti “material resources” maipapan iti “sex”, ken masansan nga agpannurayda kadagiti “inaccurate sources” a kas ti social media.
