BAGUIO CITY – Indeklara ti agarup amin a 27 a munisipyo ti Abra kas ‘persona non grata’ wenno saan a maikabkabilang iti lugarda ti amin a miembro ti Communist Party of the Philippines-New People’s Army-National Democratic Front (CPP-NPA-NDF).
Inramanda iti deklarasyon dagiti amin a makakanigid a grupo a saksakupen ti komunista a grupo.
Inaramidda ti deklarasyon gapu kadagiti kinaranggas ken panangallilaw nga ar-aramiden dagiti nasao a grupo a mangituntunda iti panagbuteng ken panagdanag kadagiti umili nangruna dagiti agindeg kadagiti nasusulinek a lugar iti probinsia.
Naamuan a dua laengen a munisipyo sadiay Abra ti adda iti proseso ti panangideklara kadagiti komunista ken makakanigid a grupo kas ‘personan non grata’ iti lugarda.
Sigun kadagiti lokal a gobyerno ti Abra, dagiti komunista ken makakanigid a grupo ket pangta kadakuada a manglaplapped iti agtultuloy a kappia ken panagdur-as iti probinsia.
Mangnamnama met ti militar a babaen iti nasao nga addang ket maituloy dagiti programa ken proyekto para iti panakaidanun ti panagdur-as ken iti agtultuloy a seguridad sadiay Abra.
