Imbilin ni President Ferdinand Marcos Jr., kadagiti mangidadaulo kadagiti Government-owned wenno Controlled Corporations (GOCCs) Governing Boards a mangisumitir dagitoy iti courtesy resignation, kalpasan ti panangisumitir dagiti cabinet officials iti courtesy resignation-da.
Gapu iti dayta, imbilanda Governance Commission for GOCCs Chairperson Atty. Marius Corpus, Commissioners Atty. Brian Keith Hosaka ken Atty. Geraldine Berberabe-Martinez kadagiti amin a Non Ex-Officio Chairpersons, Chief Executive Officers ken kadagiti amin nga appointive Directors/Trustees/Members ti GOCC Governing Boards a dagus a mangisumitir dagitoy iti courtesy resignations kas pammilin ti presidente.
Nupay kasta, naipalagip kadakuada nga ituloyda nga agreport kadagiti trabahoda ken aramiden dagiti sigud a responsibilidad dagitoy agingga nga awan paylaeng ti direktiba ni President Marcos Jr.
Naibilin metlaeng kadagiti Non Ex-Officio Chairpersons ken CEOs nga i-addressda ti courtesy resignations dagitoy iti Presidente ken isumitirda babaen iti Office of the Executive Secretary.
Kabayatanna, naibilin met kadagiti Appointive Directors, Trustees, ken Members ti GOCC Governing Boards nga isumitirda dagiti courtesy resignations dagitoy iti Governance Commission ken i-address metlaeng iti presidente.
