Pinalubosan ti Department of Education dagiti dadaulo ti pagadalan iti pagilian nga ikanselarda ti klase iti masakupanda a lugar nu napudot la unay ti panawen gapu iti El Niño phenomenon.
Sigun kenni Department of Education Assistant Secretary Francis Bringas, ipalubosda ti suspension ti klase kadagiti parapubliko a pagadalan gapu ta posible nga agbayag ti El Niño agingga inton Mayo 4 ti agdama a tawen.
Immunan a nakanselar ti klase kadagiti amin a lebel idiay Negros Occidental sipud idi Lunes kalpasan a nailistada ti 41°C heat index.
Nasuspendir metlaeng ti klase iti elementarya agingga senior high school idiay Bacolod City tapno masalwadan dagiti estudyante ken mannursuro manipud iti heat cramps, heat exhaustion wenno heat stroke a posible nga itunda ti napudot unay a panawen.
Gapu iti daytoy, naibalakad kadagiti pagadalan nga agisagana dagitoy ti cold water dispensers, electric fan units ken liklikanda pailaeng dagiti outdoor activities.
Naibalakad metlaeng ti panagaramat kadagiti komportable a bado malaksid pay kadagiti uniporme dagitoy.
