Makidkidaw iti Regional Tripartite Wages and Productivity Boards (RTWPBs) ti panakapapartak a panakangato ti sueldo dagiti mangmangged iti pagilian a Pilipinas.
Iti panakiuman ti Bombo Radyo kenni Mike Cabangon, dadaulo ti Kilusang Mayo – Cordillera, kasapulan ti dagus a panakaipangato ti sueldo dagiti mangmangged gapu iti agtultuloy nga inflation wenno panagngato ti presyo dagiti gagatangen.
Sigun kenni Cabangon, marigrigatanen ti tunggal Pilipino kas maibasar iti inwaragawag ti IBON Foundation ken Trade Union Congress of the Philippines.
Nupay kasta, awan ti addang nga ar-aramiden ti gobyerno tapno masolusyunan daytoy nangruna nu maipapan ti sueldo.
Impeksa pay ni Cabangon nga agingga iti agdama ket agtaltalinaed a nababa ti sueldo dagiti mangmangged nangruna dagiti agtratrabaho iti pribado a sektor a dumanon iti P430, nu sadino saan nga umdas para iti inaldaw a paggastusan nangruna ket naituding a P1,100 ti family living wage ditoy pagilian.
Umap-apela ni Cabangon kadagiti nakatugaw iti gobyerno a nasken nga agtignayda tapno sumayaat ti kabibiag ti tunggal Pilipino.
Kasta met a saanda a lapdan dagiti maisingsingasing iti kamara kas iti P150 wage hike para kadagiti mangmangged iti pribado a sektor iti pagilian.
Kabayatanna, kinuna ni Cabangon kadagiti mangmangged a nasken a saan dagitoy a mapnek kadagiti nababa a sueldo no mabalin met a maipaayaanda ti nasaysayaat pay a sueldo.//Bombo Mera Pacpacan
