BAGUIO CITY – Iyap-apela ti Jeepney Operators and Drivers Association iti Cordillera ti dagus a panangipaay ti LTFRB iti fuel subsidy nangruna ta manamnama manen ti panagngato ti presio ti petrolyo kadagiti sumarsaruno a lawas.
Iti panakiuman ti Bombo Radyo Baguio, kinuna ni Pat Evangelista, presidente ti nasao a federasion, saan a naikalintegan ti rason ti ahensia a maitantan ti distribusion ti subsidiya agingga inton Mayo 8 gapu iti election ban.
Impeksana a nabayagen a paglintegan ti gobierno ti election ban isut gapuna a naadal ken napagsaganaan koma daytoy ti LTFRB tapno saan nga agbalin a lapped iti panakaiwaras ti fuel subsidiya nangruna ta daytoy ita ti kasapulan ti transport group.
Inmunan iti dayta, inwaragawag ti LTFRB-Central Office a maituloyen ti panangiwarasda iti fuel subsidy ita a bulan kalpasan a nakaalada ti exemption permit manipud iti COMELEC para iti panakailaksidda iti Election ban.
