Sinentensiaan iti Municipal Trial Court in Cities Branch I a “guilty beyond reasonable doubt” ti sigud a deputy chief iti Public Order and Safety Division a ni Allan Dela Cruz Faustino iti tallo a bilang iti qualified gender-based sexual harassment kontra iti maysa a babai nga empleyado.
Maibasar iti desision a napetsaan iti Mayo 25, 2026, napaneknekan a napasamak dagiti insidente iti uneg iti opisina iti POSD idi Nobiembre ken Disiembre 2024, ken saklaw daytoy iti Republic Act No. 11313 o Safe Spaces Act.
Ti biktima ket nabigbig laeng kas “AAA” tapno masalakniban ti kinasiasinona.
Karaman kadagiti inaramid ni Faustino ti panagtugaw iti abay iti biktima nga awanan ti pammalubos, panangaramid iti body-shaming ken sexist a komento, ken panagkatawa idi tinubngar iti biktima.
Napaneknekan metlaeng nga inawaganna daytoy iti maysa a bar nu sadinno napilit nga agtugaw ken i-entertain ti grupo, kasta metten ti maulit-ulit a pananggoyugoy kenkuana iti bar iti baet ti panagkedkedna. Maysa pay nga insidente ti ti saan a nasayaat a physical contact iti uneg iti opisina.
Sigun iti korte, ti amin a nadakamat ket saan nga imbitasyon ken awanan iti pammalubos.
Maibilbilang a qualified dagiti kaso gapu iti posision ni Faustino iti gobierno ken napasamak dagiti insidente iti uneg iti government office.
Nasentensiaan ni Faustino iti innem nga aldaw nga arresto menor para iti umuna a dua a bilang ken tallo a bulan nga arresto mayor para iti maikatlo a bilang, malaksid pay iti gender sensitivity seminar ken pakabuklan a P70,000 a gatad.
