BAGUIO CITY – Awanen ti limitasyon iti bilang dagiti turista a sumrek ditoy Baguio City.
Iti waragawag ni Mayor Benjamim Magalong, kinunana a saanen a maipatungpal ti limitasyon iti bilang dagiti bisita a mapalubusan a sumrek agsipod ta adda itan ti syudad iti Alert Level 1 manipod idi Marso 1 agingga Marso 15.
Kinunana a babaen iti daytoy, maamoan ti umno a bilang ti tourist arrivals kagiddan iti saan a pannakaisakripisyo ti salun-at dagiti residente ken dagiti turista
Innayunna a maadal pay nu kasano iti pannakaimanehar ti trapiko, mobility dagiti tao nangruna kadagiti lugar a kadawyan a pagturturungan dagiti umili kas iti markets ken malls pakairamanan iti pannakamonitor ti umno nga air quality ken crowd counting babaen iti Smart City System ti syudad.
Inlawalwagna met a konsepto daytoy iti in-inot a panagrekober ti syudad manipod iti pandemya.
Gapu iti dayta, kinunana a makibinnadangda kadagiti pribado ken sektor iti negosyo ditoy syudad tapnu makabukelda iti napintas a plano a makatulong kadakuada a makarekober kagiddan iti transition iti ‘new normal’.
