BAGUIO CITY – Linawlawagan ti Baguio City Police Office (BCPO) – Station 8 ti pudno a napasamak kalpsan a nagwaras iti social media ti post seknan iti panagtaripnong dagiti nagannak dagiti estudyante iti Camp 7 Elementary School ditoy siudad ti Baguio idi kalman gapu iti maatap nga insidente ti panagkawtibo.
Maibasar iti post, dandani alaen dagiti lallaki a nakalugan iti puraw a lugan ti dua nga babbai nga estudyante idi malem kalman kabayatan ti panaga-awid dagiti estudyante.
Pagan-annaden pay ti nangipost dagiti ubbing ditoy siudad ken kiniddawna ti panakaiwaras ti nasao nga insidente.
Nupay kasta, iti panakipatang ti Bombo Radyo kenni PMajor Francisco Ben, commandet ti BCPO-Station 8, inladawanna nga exaggerated ti nasao nga istorya iti post.
Kinunana a kas maibasar iti imbestigasyonda, magmagna dagiti dua a babbai nga estudyante tapnu apanda mangaldaw idi adda ti dua a lalaki a nakalugan iti puraw a lugan a nakaparada iti igid ti kalsada.
Nagdamag ti maysa kadagiti nasao a lallaki kadagti ubbing ngem idi inala daytoy ti atension dagiti ubbing ket nagtaray dagitoy.
Bimmaba ti nasao a lalaki iti lugan tapnu suruten ken pakalmaenna dagiti ubbing ngem ad-adda a nagtaray ken naglemmeg dagitoy.
Patien pay ti opisyal a nabutngan ken nakigtot dagiti dua nga ubbing gapu iti pisikal ti langa ti nasao a lalaki.
Naituding nga iladawan dagiti ubbing ti nasao a lalaki para iti cartography sketch.
Umap-apela pay ni PMajor Ben kadagiti umili a no adda dagiti mapasamak nga insidente ket dagiti pulis ti unaenda a kamangen para iti naparpartak a panakaipaay ti aksiyon.
