Impakaammo iti Office of the Civil Defense (OCD) a dumanon itan iti 13 ti death toll gapu iti panagdalapos ni bagyo nga Opong.
Sigun iti nasao nga opisina, buklen daytoy ti 3 manipod Masbate ken 10 manipod Eastern Visayas.
Malaksid iti dayta, dumanon metten iti nasurok 23,330 a pamilya ti agtaltalinaed ita kadagiti evacuation centers.
Iti kaudian a datos dagitoy, nakasublin kadagiti babbalayda ti lima a mangngalap a naireport a mapukpukaw idiay Eastern Samar.
Kabayatanna, naideklara metten ti State of Calamity iti probinsya iti Masbate gapu iti nakaro a panakaapektar daytoy iti panagdalapos ni bagyo nga Opong.
Immuna metten nga impakaammo iti National Disaster Risk Reduction and Management Council (NDRRMC) a ti nasao a lugar ti kangrunaan a naapektaran.
Sigun iti maysa nga opisyal iti nasao nga opisina, nangitunda ni Opong iti panakadadael dagiti babbalay ken electrical lines partikular iti mainland Masbate ken kadagiti isla iti Ticao ken Burias.
Nupay kasta, saan pay a maibaga ti nasao mnga opisina ti pakabuklan a danyos ni Opong sadiay Masbate.
