Baguio City- Nakasaganan ti delegasyon ti Department of Education- Cordillera (DepEd-CAR) iti mapadpadaanan a Palarong Pambansa a maipatungpal idiay Cebu City manipud Hulyo 6-17 iti agdama a tawen.
Sigun kenni DepEd CAR Regional Director Estrella Cariño, dumanon iti nasurok pito gasut ti maipatulod a partisipanti ti Cordillera nu sadino buklen daytoy dagiti atleta ken coaches.
Mangnamnama pay ni Dir. Cariño a napintas ti agbalin a performance dagiti atleta agsipud ta amin nga ay-ayam ket salipan ti Team Cordillera.
Innayon na pay nga awan sarday ti ensayo ken training dagiti atleta ken coaches nga idaolwan dagiti nagduduma nga school division offices ti tunggal probinsya tapno maipanamnama ti kanasasagana dagitoy intun madanin ti competition proper.
Awan metten ti pagparikutan dagiti players ken coaching staff iti pagkasapulan da kas iti uniporme a maaramat ken naisagana metten dagiti plane tickets dagitoy para iti naituding a panagturong da idiay Cebu City intun Hulyo 2.
Immuna metten a binisita ti DepEd Cordillera ti Cebu City tapno personal a sukimaten ken inspeksyunen dagiti pagadalan a pagnaedan dagiti atleta iti agarup dua a lawas a kompetisyon.
Maipalagip a nagun-od ti Cordillea Region ti maikasiyam a pwesto iti 2023 nga edisyon ti Palarong Pambansa a naisayangkat idiay Marikina City nu sadino 17 ditoy ti Gold, 17 ti Silver ken 14 ti Bronze medals wenno pakabuklan a 48 a medalya.//Jordan Tablac
