BAGUIO CITY – Inapektaran ti isyu ti coronavirus disease – 2019 wenno COVID-19 ti demand kadagiti highland vegetables wenno dagiti nateng a mapapataud iti Benguet, Mountain Province ken Ifugao.
Iti interview ti Bombo Radyo kenni Agot Balanoy, panakabagi ti liga dagiti asosasyon iti La Trinidad Vegetable Trading Post, kinunana a normal a tunggal umuna a kwarter ti tawen ket nababa ti demand kadagiti highland vegetables gapu iti kaawan ti adu unay nga okasyon.
Sigun kenkuana, awan ti panag-sobra iti suplay dagiti nateng kadagitoy a panawen ngem adu laeng dagiti rason no apay a nababa ita ti presyo kas iti nababa a demand iti nateng iti merkado.
Dinakamatna a ti isyu iti COVID-19 ti baro a naka-apektar iti presyo dagiti nateng iti lokalidad gaputa mismo a dagiti buyers manipud lowlands ti nangkuna a bimmaba met ti demand manipud kadagiti supsuplayan dagitoy nga establishimiento kas iti hotels ken restaurants.
Inlawlawagna a gapu iti COVID ket 25 percent laengen ti order dagiti hotels ken restaurants sadiay Boracay kadagiti buyers ti highland vegetables gapu iti bassit a kustomer dagitoy.
Innayonna a gaputa naksayan ti order dagiti buyers ket naksayan met ti gatgatangen dagitoy manipud kadagiti mannalon iti lokalidad ken no awan ti maawat nga orders dagiti buyers ket saan metten a gumatang iti nateng dagitoy.
Maipalagip a gapu iti isyu ti COVID-19 ket adu a crowd-drawing events wenno aktibidad sadiay lowlands ti nakanselar.
Dinakamat ni Balanoy a maysa pay a rason iti nababa a presyo dagiti nateng kadagiti trading post sadiay Benguet ket ti panagkissay dagiti buyers sadiay Divisoria iti kaadu dagiti gatgatangen dagitoy.
Inlawlawagna a gapu iti clearing operations ti lokal a gobyerno ti Manila kadagiti kalsada iti masakupan ti Divisoria ket naikkat dagiti pwesto a paglaklakwan dagiti buyers kadagiti gatgatangen dagitoy a natnateng ditoy lokalidad.
Gapu iti daytoy, awanen ti paglakuan dagiti nasao a buyers a nagresulta met tapnu kissayanda ti gatgatangenda a nateng sadiay La Trinidad.
