BAGUIO CITY – Mapagdandanagan ti posible a panagbaba ti demand kadagiti highland vegetables ita a bulan ti Nobyembre ken iti sumarsaruno pay a bulan gapu iti epekto ti nagsasaruno a bagyo a dimmalapus iti pagilian.
Iti interview ti Bombo Radyo Baguio, kinuna ni Agot Balanoy, panakabagi ti liga dagiti asosasyon iti La Trinidad Vegetable Trading Post nga adu kadagiti traders ken buyers ti saan a nagtuloy a nagturong kadagiti trading centers sadiay La Trinidad gapu iti layos sadiay Metro Manila.
Kinunana a saan metlaeng a makailako dagiti buyers ken traders ti nateng sadiay Metro Manila gapu iti mapaspasaran a panaglayos.
Sigun kenkuana, uray adda ti makasang-at a buyers manipud Metro Manila ken dadduma a lugar ket limitado laeng ti gatangenda a nateng.
Innayon ni Balanoy nga adda dagiti mannalon iti Benguet, Mt. Province ken Ifugao a nadadaelan iti mula gapu kadagiti bagyo.
Nupay kasta, impanamnamada nga umdas latta ti suplay ti nateng para iti masungad a holiday season.
