Inwaragawag ni Department of Agriculture Secretary Arnel de Mesa ita nga aldaw a temporaryo nga isardengda ti roll-out ti P20 per kilo rice program agingga inton May 13 wenno kalpasan ti 2025 midterm elections.
Kasaruno daytoy ti kiddaw ni COMELEC Chair George Garcia kadakuada nga isardengda pailaeng ti nasao a programa tapno saan a maaramat iti pulitika wenno kampanya dagiti kandidato.
Dinakamat ni de Mesa a nu maituloy ti nasao a programa ket agtalinaed a pilot areas ti Central, Eastern ken Western Visayas kasta metten ti Negros Island Region.
Innayon pay ti nasao nga opisyal a dagiti Kadiwa Centers idiay Metro Manila ken dagiti lugar a nakipaset iti food security emergency declaration kas iti Camarines Sur, Bulacan, ken Mati ket mairaman.
Impasigurado met ni de Mesa iti publiko nga adda ti umdas a suplay ti bagas para iti nasao a program agingga inton Disyembre.
Maibasar iti datus dagitoy, adda ti 370,000 metric tons wenno 6 million bags ti bagas.
Dumanon metten iti 2,500 a Pilipino ti nakagatang iti bagas iti P20 tunggal kilo bayat ti launching ti program idi kalman, Mayo 1.
