BAGUIO CITY – Naituding nga agpirma iti Memorandum of Agreement ti Deparment of Education (DepEd) – Baguio, ti militar ken pulisya inton Huwebes para iti napalawa a partnership dagitoy iti implementasion ti blended learning dagiti estudyante ditoy siudad.
Iti interview ti Bombo Radyo Baguio kenni Marie Carolyn Verano, Schools Division Superintendent ti DepEd-Baguio, kinunana a nailanad iti katulagan a tumulong dagiti pulis ken soldado iti panakaiwaras dagiti naiyemprenta a learning modules dagiti estudyante.
Kinunana a nailanad metlaeng ditoy ti clustering ti schedule para iti door-to-door a panakai-deliver dagiti learning modules dagiti estudyante iti tunggal barangay.
Dinakamatna nga immunan a timmulong dagiti uniformed personnel iti panakaisayangkat ti pilot run ti implementasion ti blended learning kadagiti tallo a parapubliko a pagadalan ditoy siudad.
Inaklonna pay a makasalimetmet ti ahensia iti gastos babaen kadagiti pulis ken soldado gaputa saandan a kasapulan nga aggastos pay para iti panakai-deliver dagiti learning modules dagiti ubbing.
Kabayatana, dumanon iti 45 a parapubliko a pagadalan ti elementarya, 22 a sekondarya ken 21 a learning centers ti Alternative Learning Center ditoy Baguio City ti naituding a maipaayan kadagiti leraning modules manipud iti DepEd.
