Impaganetget ti Korte Suprema (SC) a rumbeng a nalawag ken eksakto iti search warrant ti lokasion a panggep dagiti otoridad a sukimaten bayat ti operasion.
Inkeddeng ti Korte Suprema a dagiti search warrant nga awanan kadagiti eksakto a detalye maipapan iti lokasion a masukimat ket saan nga balido, gaputa manglabsing dagitoy kadagiti constitutional protections kontra kadagiti saan a nainkalintegan a panagsukimat ken panangsamsam.
Daytoy a desision ti nangiturong iti pannakaabsuelto ti maysa nga indibidual a naidarum iti illegal possession of dangerous drugs ken drug paraphernalia iti sidong ti Comprehensive Dangerous Drugs Act of 2002.
Idi 2017, nangisayangkat dagiti kameng ti Philippine Drug Enforcement Agency (PDEA) iti search warrant kontra iti nasao nga indibidual.
Nakalanad iti warrant ti lokasion ti indibidual kas “informal settlers compound, NIA Road, Barangay Pinyahan, Quezon City.”
Insayangkat dagiti kameng ti PDEA ti operasion babaen ti puersa a panagserrekda iti balay ti indibidual a saan a nagtuktok wenno inwaragawag ti kaadda dagitoy.
Kalpasanna, kinemmegda ti indibidual ken nakumpiskarda dagiti sachet a naglaon iti shabu.
Nupay sinentensiaan ti regional trial court ti indibidual ken pinatalgedan ti Court of Appeals ti desision, binaliktad ti SC dagiti pangngeddeng.
Imbilang ti Korte Suprema a saan nga umno ti search warrant gaputa nalabes ti kalawana —a panaglabsing iti 1987 a Konstitusion.
Kabayatanna, napaliiw ti SC dagiti procedural violations iti pannakaipatungpal ti warrant.
Maibasar iti Rule 126, Sections 7 ken 8 ti Rules of Court, masapul nga ilasin dagiti government agents ti bagbagida ken agkiddaw iti pammalubos sakbay a sumrekda iti maysa a lokasion.
