BAGUIO CITY – Maan-anopen ti soldado a nangpalpaltog iti dua nga empleyado ti kapitolyo ti Kalinga idi rabii a nagresulta iti ipupusay ti maysa kadagitoy.
Nabigbig dagiti biktima a da Denver Sangdaan Tubban, empleyado ti Provincial Governor’s Office ti Kalinga, residente ti Purok 1, Bulanao, Tabuk City, Kalinga ken ni Jenner Bananao Ewad, empleyado iti kapitolyo ti Kalinga, residente ti Magnao, Tabuk City, Kalinga.
Nabigbig met ti suspek a ni Denmark Baddongon, kameng ti 503rd Infantry Brigade ti Philippine Army, residente ti Naneng, Tabuk City, Kalinga.
Maibasar iti report, napasamak ti pammaltog iti Florendo Compound sadiay Purok 6, Bulanao, Tabuk City, Kalinga idi rabii.
Iti salaysay ti testigo, nagturong ti suspek iti nasao a compound a nakaimet iti paltog ken kinumprontarna ti biktima a ni Denver Tubban para iti panakareimburse ti kwartana a P2,000.
Kinuna ti testigo a ditoy metten nga imputok ti suspek ti paltogna a revolver iti sumagmamano a daras.
Sigun pay iti testigo, pinagannad daytoy ni Tubban kabayatan ti iyaasidegda iti gate ti balay, no sadino, pinalpaltogan ti suspek ti biktima iti sumagmamano a daras.
Kinunana pay a pinalpaltogan metlaeng ti suspek ti maikadua a biktima wenno ni Ewad a nanggandat a mangtulong kenni Tubban.
Naitaray ni Tubban iti Kalinga Provincial Hospital ngem naideklara daytoy a dead on arrival bayat a naitaray ni Ewad iti Almora General Hospital.
