Kidkidawen ti Bauko Rural Health Unit ti panagtulnog ken disiplina dagiti umili tapno mapababa ken maprebentaran ti panagngato ti kaso ti dengue iti nasao a probinsiya.
Sigun kenni Ronald Cajigan, Sanitary Inspector iti Bauko Rural Health Unit, nangisayangkatda iti Targeted Outdoor Residual Spray (TORS) ken fogging iti daduma a barangay iti Bauko kas kuma iti Guinsadan Central a paset iti dengue prevention nu sadino naibinglay metlaeng iti usto a panagusar iti nasao nga insecticide.
Iti sabali a bangir, tapno maliklikan ti panagngato pay ti kaso ti dengue, al-allukoyen ni Cajigan dagiti umili nga ipatungpalda ti 5S advisory manipud iti Department of Health (DOH) a pakairamanan ti search and destroy mosquito breeding sites, seek early medical consultation, self-protection measure, support fogging impending outbreak, ken sustain hydration.
Kinunana metlaeng a ti involvement ti umili ket makatulong iti napaspaspas a panang-implementar kadagitoy.
Kabayatanna, sigun iti Rural Health Unit, adda dagiti barangay a nakailista ti kaso iti dengue iti nasao a probinsiya kas ti Guinzadan.
Nupay kasta, sigun met kenni Liezel Diwayan, Barangay Health Worker iti Guinzadan Sur, ti maysa a rason ti panag-ado ti kaso iti dengue iti nasao a barangay ket gapu iti maururnong a danum kadagiti containers nangruna nu panagtutudo.
Malaksid iti Guinsadan, nakailista metlaeng iti kaso ti Dengue ti daduma pay a barangay a pakairamanan ti Poblacion ken Sadsadan.//Via Sunshine Olod Felipe, Local News Correspondent
