BAGUIO CITY – ‘Achievement’ para iti Baguio City Jail Male Dormitory ti disiplina nga addaan kadagiti Persons Deprived of Liberty bayat ti panakaipakaammo ti cashless system iti uneg ti pagbaludan.
Kasaruno daytoy ti napasamak a gulo bayat ti panakaipakaamo ti nasao a sistema iti maysa a detention center idiay San Mateo, Rizal.
Iti interview ti Bombo Radyo kenni Jail Superintendent April Rose Ayangwa, Warden ti Baguio City Jail Male Dormitory, naiyusuat ti cashless system sakbay ti panakaipatungpal daytoy idi napan a tawen tapno maipakaawat ti proseso daytoy kadagiti balud.
Malaksid iti dayta, naipakaammo metlaeng kadagiti pamilya dagiti inmates ti nasao a sistema.
Panggep ti cashless system a malapdan ti corruption, prison drug trade ken dadduma pay nga illegal transaction iti uneg ti pagbaludan.
Kabayatanna, maysa kadagiti pakaseknan dagiti Persons Deprived of Liberty ti kinatalged dagiti kwarta dagitoy isu’t gapu na a naaramid ti passbook tapno makita dagiti sumsumrek a kwarta kasta met dagiti maibawbawas kadagiti transactions dagitoy.
Dakkel met ti panagyaman ni warden Ayangwa iti kooperasyon dagiti inmates kadagiti baro a pagannurotan a maipatungpal iti uneg ti pagbaludan kasta met ti kinaaktiboda ti pannakipaset kadagitoy.
