Binallaagan ti Department of Migrant Workers (DMW) ti publiko kontra kadagiti illegal recruitment scams a siuulbod a mangikari iti panggedan iti ballasiw-taaw babaen missionary wenno tourist visa arrangements.
Kinuna ni DMW Secretary Hans Leo Cacdac a maysa nga indibidual ti naidarum iti sanguanan ti Department of Justice (DOJ) mainaig kadagiti nasao nga addang.
Dinakamatna dagiti kaso a kas dagiti indibidual a pimmanaw iti pagilian babaen ti tourist visa nga addaan kari a panggedan, ngem natakuatanda laeng idi simmangpetda nga awan ti lehitimo a trabaho nga agur-uray kadakuada.
Imbutaktak ni Cacdac nga aktibo dagiti scam hubs iti Southeast Asia, nangruna iti Myanmar, Laos ken Cambodia, kasta metten ti Thailand ken Malaysia nga agserserbi kas common entry points.
Dagiti biktima ket kadawyan a maipapayan ti tourist visa imbeas a legal work permits.
Karaman kadagiti maaw-awagan a “red flags” iti panagpanaw iti Pilipinas ket ti panagpanaw iti pagilian nga awan ti lisensiado a recruiter; naibaon babaen ti tourist visa; awan ti balido a work visa, soft copy laeng wenno berbal a pammatalged; ken awan ti resibo wenno dokumento manipud iti recruiter.
Idagdagdagna kadagiti Pilipino a mangpangpanggep a mangged iti ballasiw-taaw ket beripikaren nu ti maysa a recruiter ket lisensiado babaen ti DMW.
