BAGUIO CITY – Nakemmeg ti maysa a drug personality iti buy-bust operation nga insayangkat dagiti otoridad sadiay East Quirino Hill, Baguio City idi kalman.
Nabigbig daytoy a ni John Patrick Timbal Peñamente, 28-anyos, laborer, tubo ti Cavite ken residente ti Marville Subdivision, Irisan, Baguio City.
Nakumpiskar kenkuana ti maysa a pakete ti maatap a shabu, buy-bust money ken ti cellphone nga inaramatna kabayatan ti operasion.
Maibasar iti rekord, ni Peñamente ket nakalista kas Streel Level Individual ti Baguio City Police Office – Station 2 ken High Value Individual ti PDEA-Baguio.
Naamuan a natiliw metlaeng ti inana idi 2016 ken 2019 gapu iti iligal a droga a nangpabalin kadakuada a napeklan a drug dealers iti pagnanaedanda a barangay.
Naamuan pay a kaaduan kadagiti kustomerda ket dagiti drivers, laborers ken dagiti small-time criminals.
Iti agdama, sumangsango ni Peñamente iti kaso a panaglabsing iti RA 9165 wenno Comprehensive Dangerous Drugs Act of 2002.
