BAGUIO CITY – Nakemmeg ti maysa a drug pusher a maibilbilang a High Value Individual ti Directorate for Intelligence ti Philippine National Police kalpasan a nagpositibo ti naimplementar ti search warrant a naisayangkat iti pagtaenganna sadiay Suyang, Tabuk City, Kalinga idi kalman.
Nabigbig daytoy a ni Clifford Wailan Batawang, 34-anyos ken residente ti Suyang, Tabuk City, Kalinga.
Nagresulta ti operasyon iti panakakumpiskar ti maysa a caliber 22 rifle a naglaon ti magazine ken 12 a bala, maysa a caliber 22 magnum revolver a naglaon ti maysa a bala ken maysa a basyo ti bala, maysa a caliber 45 a naglaon ti magazine ken pito a bala ken dua pay a bala a naikabil iti maysa nga sling bag.
Nakumpiskar pay ti 10 a pakete ti mapapati a shabu nga agdagsen ti agarup nasurok tallo a gramo ken aggatad ti P20,400 a naikabil iti nangisit a pouch, tallo a naaramaten nga aluminum foils ken maysa a lighter.
Sumangsango itan ni Batawang iti kaso a panaglabsing iti RA 9165 wenno ti Comprehensive Dangerous Drug Act of 2002 ken iti RA 10591 wenno ti Comprehensive Firearms and Ammunition Regulation Act.
Naisayangkat ti operasyon babaen iti nagtitipon a personnel dagiti nagduduma nga unit ti Cordillera Police ken PDEA-Cordillera.
