Awan pay ti panggep ti lokal a gobyerno ti Baguio City a mangipatakder iti drug rehabilitation center.
Sigun kenni Liza Bulayungan, City Social Welfare and Development Officer, adu ti pondo a kasapulan para iti pannakaipatakder ti nadakamat a pasillidad.
Gapu iti dayta, iti agdama ket maiturturong dagiti drug surrenderees iti Mega Rehabilitation Centers idiay Pangasinan, Nueva Ecija, ken Dagupan para iti rehabilitation dagitoy.
Mainaig iti dayta,bimmaba met ti bilang dagiti Person Who Use Drugs a mailislista iti Baguio City.
Sigun kenni Major Marcy Grace Marron, Chief Public Information Officer ti Baguio City Police Office, nakailista iti siudad iti 108 a drug personalities manipud idi bulan ti January agingga November 18.
Daytoy ket nababbaba iti 30 a kaso nu idilig idi napalabas a tawen nu sadino, nakailista ti dagitoy iti 138.
Malaksid iti dayta,impeksa ni Major Marron a kaaduan kadagiti matiltiliw dagitoy a drug users ken pushers ket saan a nagtaud iti Baguio City.
Sigun kenkuana, kadawyan kadagiti maar-arestar dagiti kameng ti pulisya nga aglablabsing iti RA 9165 wenno Comprehensive Dangerous Drugs Act of 2002 ket boarders wenno agab-abang laeng kadagiti pagdagusan iti Baguio City.
Gapu iti dayta, mangipatpatungpal dagiti awtoridad kadagiti intervention programs kas iti information drive nangruna kadagiti pagadalan.
Malaksid iti dayta, kanayonda a mangipatpatungpal kadagiti Oplan Galugad kadagiti pagbaludan iti nasao a siyudad.//Bombo Genzel Depayso
