BAGUIO CITY – Nakemmeg ti dua a lalaki kalpasan a naduktalan ti panggepda a mangibiyahe ti marijuana paturong sadiay National Capital Region.
Nabigbig dagitoy a da Jemssie Galang Salazar iti Bacoor, Cavite ken ni Justin Jerome Jacinto Baisa a residente ti San Mateo, Rizal.
Iti panaki-uman ti Bombo Radyo Baguio kenni Police Capt. Jeremias Toyocan, dadaulo ti Tuba Municipal Police Station, naaksidente iti paset ti kennon road ti ford ranger pick-up a nagluganan ti dua a lalaki kalpasan a maatap a napukawanda iti preno.
Dagus met a nirespondean daytoy dagiti miyembro ti Tuba Municipal Police station.
Nupay kasta, naduktalan a naka-imet dagiti suspek iti maysa a karton a naglaon iti 12 a tubular form ti dried marijuana leaves nga aggatad iti P1.4 million.
Nabisto ti nasao a marijuana kalpasan nga impaigid daytoy dagiti suspek iti kalsada kasaruno ti panakaaksidente dagitoy.
Nupay kasta, aksidente met a natnag ti karton iti karayan a rason iti pannakaiwara ti 12 a tubular form ti dried marijuana leaves.
Iggem ita dagiti otoridad ti dua a suspek kalpasan a naagasan dagiti nasagrapda a gasgas.
Maisagsagana metten ti kaso a panaglabsing iti Comprehensive Dangerous Drugs Act of 2002 a maipila kontra kadakuada.
