Agtalinaed a nakadisplay ti dua nga Eco-bots wenno Ecological Robots idiay Kilometer 0, iti sango ti Maharlika Livelihood Center, Baguio City sipud naibangon daytoy idi narambakan iti Baguio Day.
Ti dua nga eco-bots ket inaramid ni Clinton Aniversario manipod metlaeng iti Baguio City.
Iti panakaiuman ti Bombo Radyo kenkuana, imbinglayna nga inaramatanna ti nasao a creative craft iti waste wenno scrap materials nu sadino, saan a gimmastos daytoy tapno maileppasna ti nadakamat a proyekto.
Sigun kenni Aniversario, ti eco-bots ket paset ti Adopt-a-Park Program iti Baguio City nu sadino,simbolismo dagitoy iti naisangsangayan a kultura ken pakasaritaan iti siudad kas sentro iti trading.
Innayonna a kas maysa nga artist, bigbigbigenna ti akemna iti panakasalwad iti aglawlaw babaen iti panangaramidna kadagiti banag nga ipagarop dagiti daduma nga awanen iti serbina kas maysa a napintas nga art piece.
Sigun pay kenni Aniversario, kasapulan ti anus iti panagaramid kadagiti art piece.
Para iti dua nga eco-bot nga inaramidna, dimmanon iti dua a bulan ti nabusbos tapno maileppas dagitoy.
Impeksa met ti craftsman ti ragsakna idi nairuaren ti inaramidna nga art piece para iti panangimatang ti publiko.
Kabayatanna, saan a daytoy ti immuna a gundaway a nakaaramid ni Aniversario iti kapada a klase iti craft.//Bombo Jez Lapizar
